Акафист Святителю Иннокентию, митрополиту Московскому, апостолу Сибири и Америки
Кондак 1
Избранный промыслом Божиим на престол московский, доблественными равноапостольными трудами твоими просиявший в просвещении Сибири и Америки, благодарение усердно приносим ти, Богу послужившему и иноверныя люди просветившему, да зовем ти: Радуйся святителю Иннокентие, московская похвало, и о всем мире молитвенниче предивный.
Икос 1
Ангел житием воистинну был еси, святителю отче Иннокентие, темже и мы ныне, на лик твой взирающе, вопием ти:
Радуйся в крещении Иоанном нареченный и от купели измлада Господа возлюбивый.
Радуйся от младенчества чистоту сердечную сохранивый.
Радуйся родителем своим послушание явивый.
Радуйся семи лет чтением апостола за литургией всех удививый.
Радуйся душу свою к обучению духовному устремивый.
Радуйся церковное послушание с молитвою соединивый.
Радуйся святителю Иннокентие, московская похвало, и о всем мире молитвенниче предивный.
Кондак 2
Видевши Преосвященный Михаил от Бога в тебе дарования, и послушание прилежное, поставляет тя во иерея напутствуя шествовати велетрудным путем просвещения, поя Богу: Аллилуиа.
Икос 2
Разум Богопросвещенный от Господа имея, святителю отче Иннокентие, избрал еси узкий путь просвещения, Спасителем мира указуемый, сего ради ублажаем тя сице:
Радуйся подвижниче, послушание совершенное Преосвященному твоему явивый.
Радуйся тяготы и слезы ближних твоих сродник и чад с любовию и терпением носивый.
Радуйся, постом и молитвою плоть твою духу покоривый.
Радуйся полагати на Господа упование своих сродник в бездорожии, плаваниях и бурных стихиях научивый.
Радуйся церковныя службы на всяком месте Богу приносивый.
Радуйся в мори плавающих яко искусный врач исцеливый.
Радуйся святителю Иннокентие, московская похвало, и о всем мире молитвенниче предивный.
Кондак 3
Силою Вышняго на подвиги в лишениях и испытаниях укрепляем, святителю отче Иннокентие, Промыслом Божиим вселился еси на островах алеутских, воспевая Богу: Аллилуиа.
Икос 3
Имея крестное знамение яко щит и сердце милующее, с усердною молитвою навыкл еси к Богу прибегати и к молитве люди алеутския наставляти. Темже ведуще твою теплую любовь к Богу и людям, возопием тебе тако:
Радуйся храм Вознесения яко жертву благодарения создавший.
Радуйся в неизведанной природе Бога познавший.
Радуйся трудами рук своих престол церковный устроивый.
Радуйся яко предивно Богу служити алеутов обучавший.
Радуйся состраданием и любовию их быт и скорби утолявший.
Радуйся слышанию слова Божия жителей островов научавший.
Радуйся святителю Иннокентие, московская похвало, и о всем мире молитвенниче предивный.
Кондак 4
Бурю имея скорбных помышлений, и попечение пастырское о людех имый святителю отче Иннокентие, в опасных путьшествиях на кораблеце переплывая по волнам океана, и идеже не точию пастырь, но учитель языков и всем вся новопросвещенным своим чадам в нуждах был еси, поя Богу: Аллилуиа.
Икос 4
Слышаша твою любовь и попечение о просвещении паствы Алеутской, многия языки от неверия в веру ко Христу привел еси святителю отче Иннокентие, сего ради ублажаем тя сице:
Радуйся, яко лику апостол и святителей приобщился еси.
Радуйся, яко к делам благоугождения алеутов-чад своих научил еси.
Радуйся, яко храм во имя Вознесения Господня освятил еси.
Радуйся, яко жители островныя крестил еси.
Радуйся, яко управляя твоею паствою, церковная чада умножил еси.
Радуйся, яко заблуждшия и погибшия души взыскал еси.
Радуйся, святителю Иннокентие, московская похвало, и о всем мире молитвенниче предивный.
Кондак 5
Боготечная звезда явился еси, Богомудре святителю отче Иннокентие, не токмо небо Церкве Русския украшая, но и страны языческия осиявая, нас же и их светом к тихому пристанищу спасения наставляя, да вси приносят песнь Богу: Аллилуиа.
Икос 5
Видевше тя, новопросвещеннии жителие алеутстии, зело радовахуся и приходяща к тебе, яко чада ко отцу, взывая сице:
Радуйся таинств церковных ревностный совершителю.
Радуйся истинному покаянию во гресех научителю.
Радуйся, твоим писанием ««Указание пути в Царствие Небесное» руководителю.
Радуйся недуговавших пиянством и иными страстьми вразумителю.
Радуйся укоренившихся пороков сластолюбия искоренителю.
Радуйся вдов, сирот питателю и всех страждущих успокоителю.
Радуйся, святителю Иннокентие, московская похвало, и о всем мире молитвенниче предивный.
Кондак 6
Проповедник был еси Евангельскаго учения во странах сибирских, ты на дальний север Благовестие принесл еси и трудами твоими Евангелие и Деяния Апостолов новопросвещенным чадам твоим возвестил еси, с ними же и мы благодарно поем Богу: Аллилуиа.
Икос 6
Возсия остров Ситха твоими апостольскими трудами паче сияния севернаго, святителю Иннокентие, тамо бо окамененных сердцем людей колошских к покаянию пробуждаяй, сего ради благодарне взываем к тебе таковая:
Радуйся в терпении напастей и бед житие твое препроводивый.
Радуйся повеление Христово «взять крест свой и тещи в след Его» в сердце своем положивый.
Радуйся небоязненно языческия обычаи обличивый.
Радуйся, языческая верования самих шаманов в веру Христову пременивый.
Радуйся чудом смертельную опасность своей новой паствы предупредивый.
Радуйся жену-язычницу на смертном одре от оспы исцеливый и тем новое чудо явивый.
Радуйся, святителю Иннокентие, московская похвало, и о всем мире молитвенниче предивный.
Кондак 7
Хотящим нам восхвалити равноапостольный подвиг твой на острове Ситха, неусыпному попечению твоему о пастве колошстей, благовестию и храмоздательству дивимся, мы же видяще силу Божию и Богопреданную веру в тебе, вопием со умилением: Аллилуиа.
Икос 7
Новое чудо слыша от Святителя Филарета московскаго, благословляющаго тя на принятие ангельскаго образа, утешая богомудрыми словесы, яко «от Господа человеку стопы исправляются» по слову пророка Давида. Даждь и нам богомудре Святителю, разумети сия словеса, вопиющим тако:
Радуйся, равноангельскую честь получил еси.
Радуйся прежде пострига твоего в обитель Сергия Преподобнаго на уединение удалился еси.
Радуйся слезами многими труд свой исполнивый.
Радуйся мощем Киево-Печерских Святых умиленно молился еси.
Радуйся в Троице-Сергиевой пустыни от рук святителя Игнатия монашеский постриг принял еси.
Радуйся в честь святителя Иннокентия Иркутскаго нареченый.
Радуйся, святителю Иннокентие, московская похвало, и о всем мире молитвенниче предивный.
Кондак 8
Странное всем чудо показася, егда смотрением Божиим Церковь наша определи и вскоре нарече тя епископом Камчатским, Курильским и Алеутским, да исполнится пророческое слово святителя Филарета Московскаго, яко равноапостольным будеши. Тогда людие возрадовашася о тебе, просветителе своем, с благодарностью поя Богу: Аллилуиа.
Икос 8
Весь был еси умом в горнем мире, егда волнами морскими обуреваемь, преплывая и переходя дальния и трудныя снежныя пути, аки в малем гробе заключен был еси, темже терпению твоему дивящеся, зовем ти:
Радуйся, в злострадании житие твое препроводивый.
Радуйся подвиг постничества нам явивый.
Радуйся чадо твое Иакова во иерея посвятивый.
Радуйся яко и он, молитвою твоею, алеутов крестивый и просветивый.
Радуйся, яко мольбами твоими и сей просветитель единоплеменных показася.
Радуйся, к предстательству преподобнаго Германа в опасности прибегнувый.
Радуйся, святителю Иннокентие, московская похвало, и о всем мире молитвенниче предивный.
Кондак 9
Во всяких напастех и бедствиях всех утешал еси святителю отче Иннокентие, сердечную печаль прогоняя в людех, и молитвою своею укрепляя, сам же, двадесять и пять дний и нощий от сильнаго мраза злострадая, яко истинный апостольский благовестник благословлял еси Бога в сердце твоем вопия усердно Богу: Аллилуиа.
Икос 9
Ветии многовещаннии и лицы ангельстии удивишася, како ты в постриге шлем спасения восприявший и меч духовный взявший на невидимыя и видимыя враги: мир, плоть и диавола победивый, егда слышаша твоя воздыхания сердечная и слезныя моления ко Господу двадесять и восемь дний и нощий страждущаго в сильной бури на мори, да от восток солнца до запад воспоют вси ангели на небеси и человецы на земли:
Радуйся терпением напастей и скорбей просиявый.
Радуйся дар избавления от злых духов стяжавый.
Радуйся по слову писания «Блажен, иже скоты милует», тако и ты неустрашимо, в непроходимых пустынях ходя, древним отцем подражал еси.
Радуйся во время странствий твоих со зверьми живый, былие травное и кору древес в пищу имел еси.
Радуйся подобно Герасиму Иорданскому скоти приручил еси.
Радуйся с посохом святителя странника грады и селения обошедый и от всех великим нареченный.
Радуйся, святителю Иннокентие, московская похвало, и о всем мире молитвенниче предивный.
Кондак 10
Спасение чудное в волнении океанстем на тебе яви Господь святителю отче Иннокентие, егда кита, повинующася посла, тя доставивша ко пристанищу тихому. Всемогущему Господу Богу, сохранившему тя и прославившему твое житие в знамениих и безчисленных чудесех, вопием немолчно: Аллилуиа.
Икос 10
Стена быв крепкая всем притекающим к тебе, святителю отче Иннокентие, памятию на веки труды просвещения оставил еси, сего ради и мы, приносяще песнь тебе, вопием:
Радуйся посещении твоими народы Якутска, Амура и даже до Китая озаривый.
Радуйся строительство церквей благословивый.
Радуйся Церковь Русскую возрастивый и укрепивый.
Радуйся книги Писания на наречие тунгусское и якутское преложивый.
Радуйся во Америке сущия просветивый.
Радуйся равноапостольнаго Николая в Японии посетивый и на апостольския труды благословивый.
Радуйся, святителю Иннокентие, московская похвало, и о всем мире молитвенниче предивный.
Кондак 11
Пение умиленное приношаху людие твои новопросвещеннии, егда услыша отшествие твое на кафедру во град царствующий Москву и горце плакаху, вопия: Аллилуиа.
Икос 11
Светозарную свещу яви тя Господь на престоле московстем, праздник святителей Петра, Алексия, Ионы и Филиппа учредил еси и храм во обители Сергия Преподобнаго во имя Покрова Пречистыя Матере Господни устроил еси, да радостно тебе взываем:
Радуйся твоими теплыми попечении о всех неусыпный покровителю.
Радуйся в управлении твоем на кафедре первосвятителей Московских заповедей Христовых верный исполнителю.
Радуйся о сирых и безприютных попечителю.
Радуйся жаждущих сердца и немощствующих благодатный укрепителю.
Радуйся смирения и целомудрия учителю.
Радуйся Иерарше Христов, скорый в бедах услышателю.
Радуйся, святителю Иннокентие, московская похвало, и о всем мире молитвенниче предивный.
Кондак 12
Благодать неистощимая и знамение явися людем молящимся, егда алтарь храма Христа Спасителя ты, Святителю Богомудрый, освятил еси, научая всех Богу пети: Аллилуиа.
Икос 12
Поюще чудное житие твое, в нем же всякия скорби и тяжкая испытания терпеливо подъял еси, отче Иннокентие, и яко старец многотрудный, болезни очес в страдании молитвою и благодарением побеждая, темже вопием ти:
Радуйся благодати изображения лика твоего нам оставил еси.
Радуйся о приближении часа кончины и совершения елеосвящения предсказал еси.
Радуйся в Преблагословенную субботу мирно почил еси.
Радуйся с неба любящим тя щедрое благословение яко чадолюбивый отец, низпосылаеши.
Радуйся твоими молитвами взаимную любовь и единомыслие даруеши.
Радуйся, святителю Иннокентие, московская похвало, и о всем мире молитвенниче предивный.
Кондак 13
О Преславный Святителю отче Иннокентие, приими ныне похвальное сие пение наше, и умоли милостиваго Господа, да дарует мир и просвещение душам нашим, вопиющим Богу: Аллилуиа.
(кондак сей глаголется трижды, таже икос 1 и кондак 1)
Молитва
О Богоносне отче наш Иннокентие, московская похвало и всея Сибири и Америки просветителю, вонми молитве нашей и услыши нас недостойных, просящих твоего милостиваго заступления и помощи, да с тобою и со Святители московскими и со всеми святыми радостно прославим Отца и Сына и Святаго Духа, во веки веков. Аминь.
